回復正常

        即係咁：

        有一家人，亞仔宣佈要同亞娥結婚，但是父親拒絕，要由佢揀。父子爭執，亞爸二話不說，入廚房攞刀出來，砍亞仔。亞仔今回身手好，空手入白刃，把刀奪過來，然後係家裡靜坐，宣佈不准他與亞娥結婚，大家無電視睇、無電話打。

        於是，亞媽亞妹就出場，同亞仔講：你阻住我地睇電視、打電話，我地冇哂正常生活，太自私﹗你自己心平氣和，同老竇繼續傾，一定可以傾出結果的。

        亞仔話：好，係你先叫亞爸來，先道歉啦﹗佢出刀砍人，講聲道歉都應該啦。

        亞媽話：亞爸係咁，呢D係佢最低武力，你相就吓。最緊要都係讓開，俾我繼續睇電視啦。

        亞仔話：咁結婚單野點算先？我有冇得揀？

        亞媽話：亞爸有家用又大隻，你點同佢鬥，呢D野，都係算啦，最緊要都係讓開，俾我繼續睇電視啦。

        XXX                          XXX                          XXX

        所謂回復正常生活，不就是如同故事中的睇番電視。明明係家變，但不少人都想回到事情發生以前，好似什麼都沒有發生過這樣，這不是一種主張，而是一種駝鳥式的幻想。大佬，出催淚彈，你可以當沒有事發生過，回到正常？縱容黑道，你又話回復正常？周圍堵路，沒有一個問責官員出來承認自己有責任，你又話好正常？難道人群散去，從始就不能再聚起來嗎？難道人群散去，已經變壞的社會可以保持下去，不再腐爛，甚至復元嗎？

        也許你的生活真的好正常，因為你不是菜園村的居民，也不是南丫海難的家屬，亦不是住劏房的居民。他們讓你們過正常生活，我們的政府就好正常地運作，任他們不能正正常常。

        在今回的反政府運動中，反反政府者，只是由於無力改變任何事情，所以希望一切回到「原貌」，讓自己感覺良好一些。我自己覺得，彼此之間沒有對話的空間，原因不是意見不合，而是那一邊，太沒有主張了。