一、
朋友公司來了個新下屬，聊起來，原來新下屬與朋友同一間大學同一個學系畢業，大家後來取得的專業文憑都一樣，只是畢業相距廿年。
朋友人工70K，新下屬12K。
朋友肯定可以做到退休，新下屬則是一年約，所以他還要揼十皮出來，讀番個碩士，保持競爭力。
你話相距廿年資歷，人工當然差得遠啦，問題係，新下屬不是今年畢業，已經畢業三五年。用番相同年份來計，朋友做這份工五年，都30K啦。
讀書求搵食，今時今日，真係只搵到食架，住都搵唔到。
二、
亞仔中四一個月，媽媽與他聊讀書，他說：「老師教得不錯，都明，但冇功課做，練得少，自己總不及其他同學。」為什麼冇功課，但其他同學會好過你？「全世界都補習，做補習練習都做死，老師都不用給功課了。」
小兒當年測IQ，假假地都貼近天才，又讀Band
1學校，老師還不錯，但眼前仍然不夠競爭力，因為沒有補習。今天考試，不是說你夠聰明就可以，不是說你老師好就可以，不是說你做多點練習就可以，而是要樣樣都有才可以。
吾兒尚且如此，你叫大部分同學，情可以堪呢？
真正讀得的，一般都有點腦，他們就會意識到上面的世道，然後生出「讀咁辛苦，真的有用嗎？」的念頭。問題是，眼前沒有你選擇的餘地，全世界都在這條直路殺過去。
讀得掂但唔識諗，眼前好一點，直到出來世界變廢青時再煩；
讀得掂又識諗，眼前就好苦悶，不過見步行步啦；
讀唔掂又識諗，當然就是高危一族；
讀唔掂又唔識諗，好在這是大多數，所以跳樓才這麼少。
三、
好幾年前有研究指出，香港學童由小學三年級開始，讀書興趣就大幅滑落。
理由好簡單，因為讀書再不是一種興趣。
試想想，踢波可以是一種興趣，因為你想踢就去踢，鍾意點踢就點踢，這叫興趣。每日一定要踢，一定要射一百球，而且一定要入九十九球以上，這叫訓練。踢足一日回到家，再要玩兩個鐘足球game，日日都係玩呢個game，唔准玩另一個，由K1玩到小三，這叫虐待。
總結
現況就是，父母一開始就處心積慮搞到細路唔鍾意讀書，然後殺入中段就加入全方位比併來迫中學生讀書，最後等他們讀完後發現係廢既。
仲有，全程都加入一句話：你做乜唔努力D﹗我當年仲慘過你。
涼薄點講句，現在算死得少。
留言