一、
從琴行接女兒回家。她不是學琴,而是練琴,因為(當時)考琴在即。在路上,女兒說:
「有一個男仔和我一起練琴,我彈一回他又彈一回。」
「咁好呀,咁妳就可以休息一陣。」
「到我走時,老師說他也可以走了,但是他說想練多一次首歌。」
「佢真係好認真。」
「佢痴線。」
「妳做乜咁話人?」
女兒懶一本正經地說:「人生有唔同既生活,我地唔可以只顧一樣,唔理其他既。明明彈完又繼續,咁咪犧牲左其他生活囉,咁就係痴痴地啦﹗」
「咁妳有乜唔同的生活?」
「就係食雪條的生活囉。你快D去買﹗」
二、
與兒子往新城市途中。只有兩父子去意粉屋吃晚飯,因為太太有學校的晚間活動,而女兒堅持要陪媽媽。
「你知唔知,點解亞妹不來吃意粉屋,都要和媽媽燒野食?」
「點解?」
「亞妹話,意粉屋經常都有得食,但是陪媽媽返工的機會,很罕有。」
「哦。」
「那麼,咁難得的機會,你點解唔去?」
「罕有不一定就要做架;我夠好少疴爛屎,唔通就要特登搞到自己疴一次嗎?」
留言