年輕人，你太年青了。
十個家長，可能有一個覺得功課多到頂唔順要出聲，還有一個覺得功課多但唔會出聲，餘下的八個，有四個覺得多但又唔係真的想好少，還有兩個唔覺得多。
還有兩個呢？嫌少囉。
雖然村上春樹在《舞舞舞吧》裡借主角的口說，老師「不是精神變態就是虐待狂，不然就是兩樣都有」，回歸現實，老師都是收人工的普通人，如果俾少一樣功課，自己改少40份，做打工仔，誰想給學生多功課呢。
做父母的，問心，如果某一個下午，你在家，你的子女回到家，完全冇功課，坐在沙發看四點半的兒童節目，你會是「亞仔，好睇咩？一齊睇好唔好？」還是「你好得閒咩，齋睇電視？冇野做咩？」
我聽說過真正霸氣的父母，規定子女只有一小時功課時間，做不完就算數，同學校講，我訓練佢一小時做完，正在訓練中。
我自己一貫的主張是，父母根本就應該盡量不要理會子女讀書的事，也不要把眼前的小測呀默書呀放在心裡。在家裡管他自律自我照顧已經夠父母勞心，讀書交回給他們自己專業自主吧？
讀唔好點算？難道你真的相信，做多幾份功課，迫背多幾段書就會好？年輕人，你太年青了……
留言