巴士上，後面兩把稚嫩童聲。
「亞邊個好衰格，成日想睇人走光。」
「亞邊個個日就走光啦。」
「妳咪成日走光。」
「不同呀不同呀，佢係成邊裙飛起左，成條底褲露出來。」
愈講愈唔路，跟住講邊個邊個咸濕，最後連「性侵犯」一詞都出現。
我禁不住回頭，看看什麼細佬咁厲害。想不到，原來是兩個七、八歲，樣子可愛的小女孩。頓時有點愕然。
剛巧，大人也發話：「你倆在講什麼？為什麼要講這些東西，亞鳳，妳過來和我坐。」
兩個小孩被分開了。大人繼續訓話：「你為什麼講D咁既野，妳邊道學返嚟？妳咁樣，我回去要告訴爸爸呀。如果妳再講，我就打電話去問老師，妳點解會講D咁既野。」
最後：「妳自己好好想一想，以後不要再講這些野。」
我在想：咁即使點？
雖然我不認同小朋友在巴士上公開地亂講與性有關的種種，但是這位大人的回應，正好顯示，我們其實要講多D與性有關的東西，不然，小朋友好奇，想認知時，我們能夠採取的方法，就是恐嚇，然後叫佢唔好講。
大人自有權威，小朋友很容易辨識到，大人不願講也不願聽，結果，他們就只有私人亂學亂講了。
這處境要如何處理，為父母來說，不容易呀，我們都未做過咁樣角色。或許，這也是父母子女一起成長的好機會，待我們都想想，如何回應一些不容易回答的課題，自己都會更成熟一點。
留言