一、
看到母親勒斃智障兒子的新聞，太太喟然嘆曰：「政府為何不做多點事呢，人命嚟架。」
亞仔跳出來：「因為政府要做全民檢測囉﹗」
爸：「其實攞錢出來就可以。」
亞仔：「因為政府要做全民檢測囉﹗」
二、
亞女前後兩天，去睇《教父》一及二。
感想一：邊個話羅拔廸尼路冇後生過？我睇親佢都係後生。
感想二：原來阿爾柏仙奴後生都幾靚仔，我一直都覺得他是潦倒老伯樣。
三、
玩scrabble時聽歌，youtube 播「分分鐘需要你」，亞仔看到「你似是陽光空氣」，大惑不解：「點會係分分鐘需要你呀？」
爸：「因為你好重要，像陽光空氣那麼重要，每一分鐘都需要囉。」
亞仔：「分分鐘唔係咁用，我地只會話：『你唔好行開，係道等，我分分鐘要你過嚟。』所以，分分鐘需要你，係宜家並不需要你。」
亞仔結論：「你地聽埋D乜鬼歌。」
四、
繼續聽歌，轉出來的是林憶蓮唱「靜夜的單簧管」，合唱是某一名音樂人。亞女一見，皺眉曰：「我真係好唔鍾意佢。」
爸：「何解？」
女：「佢個款做乜鬼啫？成個失敗的小學音樂老師款咁？我見過的失敗音樂教師，就是這個款了。」
我絕倒，並覺得自己都有份造孽，刻薄應該不是天生的。
留言