當孩子還年幼時，我們經常擔心緊張種種事情。他跑，我們擔心跌倒；他吃，我們因噎廢食；出街，怕他著涼，又怕他過熱。
於是，我們每事問，每事管。
然後，小朋友更加沒有反應，於是我們愈問愈管。到了今天，太太仍然為13歲的兒子穿不穿外套而勞氣。即使外面的氣溫是27度，兒子仍然是穿薄絨長袖外套，而做亞媽的，當然會火都嚟。
這是從父母的角度來看問題，覺得小朋友總是反應遲鈍，不理好醜。試試反過來看看如何？
兒子與你出門，你看一看他，說：「咁凍，你點解唔著外套？」
跟住，真的出門，爸爸在升降機門前，又話：「咁凍，你點解唔著外套？」
落樓，在酒樓見到外公外婆祖父祖母，任何一個都會再講：「咁凍，你點解唔著外套？」
坐低飲茶，爸爸問小朋友：「你食唔食燒賣呀？」
媽媽叫：「你食多D燒賣啦﹗」
祖母鼓勵：「燒賣好好味呀﹗」
外公催促：「燒賣就凍啦，快D食。」
其實，你的一句話，小朋友好多時都要聽三五七次。試想想，如果你公司有七個老闆，每一件事，無論你做唔做、做左未、做唔做得到，每一個老闆都會來問一至兩次的話，我好有理由相信，你好快就沒有回答的熱情。
何況，今天的家庭，小朋友好多時還是做老闆的角色，你班侍從咁煩，真係睬你都傻。
所以，不要覺得，自己說少一次，會有什麼大不了。更多時候，你願意沉默，小朋友可能覺得自己執到舊金。
留言