亞仔炒左，亞女OK，但數學繼續潛水。
亞仔讀書全天才波固然唔掂，亞女的讀書方法，為我來說，低年級還可以，繼續下去會遇上瓶頸。
兩人的讀書問題，食飯閒聊時會提到，二人聽得入1%，9成9都是隨風而逝。太太許多時會苦口婆心，說之以理，我基本上提過就算。
為我來說，讀書是子女的責任，再功利點說，返學就係佢地份工，無理由工作上的問題，要我攬上身。我自己一向膺服「學校的歸學校，家庭的歸家庭」這道理，學校的事，做父母，只盡父母的責任，就是提醒子女前面有坑，避不過就落坑，就麻煩，就折墮。至於如何避坑，跳過去繞過去填坑，我可以俾意見，但落手落腳，始終要等子女自己來。
父母當然醒過子女，於是父母眼看亞仔一腳踩落坑，就會攔佢。用心是好，但子女學曉的，可能不是「坑很危險」，而是「無論如何都有父母包底」。父母見到坑就眼冤，於是不少把路線早早計劃好，叫仔女跟住行。動機是好，但仔女學會的可能是「我諗乜都冇用」。
人生路長，讀書是其中一個重要的部分，卻不是最重要。我寧可視讀書是一種成長的過程，讓他從中對過錯過，自己跌跌撞撞，最後才會自己避坑，或落左坑都可以處之泰然。
這篇文，特別送給在中環站偶遇的朋友。中午快1點相遇在繁忙的港鐵站，我問：「食完飯返Office還是現在去食飯？」佢冇妳咁好氣：「請左假回家陪亞女讀書呀﹗考試呀﹗」然後數落我唔駛煩當然可以老在網上講風涼話。
朋友，今回亞仔大炒了，其實都可以處之泰然，妳個女小一考試，妳就放過自己同放過佢啦。真的，相信，放手，眼前未必好受，但最好，妳和亞女，都會有更美好的人生。
留言